Monday, October 22, 2007
Isa pang Oda sa Telon
Muli
aawitan kita.
Ikaw na may dalawang mukha:
isang nakangiti, isang luhaan.
Huwag mo sanang ipagkait
sa bawat buga ng liwanag
at pag-agaw, pagkaminsan
ng pusikit na kadiliman,
ang mga larawan
ng sarili kong buhay
at buhay din naman
ng kapwa ko tao.
Huwag mo sanang ipagkait
sa aking pandama
ang sakit
ang sarap
ang alwan
ang hirap
sapagkat minsan din naman
kahit sa ilusyon
naipakikita ang katotohanan
at nahahantad ang kasinungalingan
nilang namamanginoon
na ibig iligaw ang pusong pumipintig
ang isip na nagsusuri
at kaluluwang kumikinig.
Subscribe to:
Post Comments (Atom)
No comments:
Post a Comment