Liham ng GABRIELA para kay Gabriela (Angel Locsin)

(Unang lumabas ito bilang liham sa patnugot sa isang investigative newspaper na pinagtatrabahuhan ko. Inihingi natin ng permiso para muling mailathala sa inyong paboritong pahayangan, ang Punto!)

Si Angel Locsin at ang mga sex video

Ang usapan sa midya kamakaylan tungkol sa pagkalat ng mga sex video ng isang babaeng hawig na hawig kay Angel Locsin ay dapat na ipagngalit ng madla, sa halip na maging debate lamang kung si Angel nga ba iyon o hindi.

Naaalarma kami sa pagkakauso ng mga sex video. Sa pagtatampok ng mga kamukha ng mga sikat na artistang babae, naaakit ng mga ito ang publiko, na nagpapakapal sa kita ng isang industriyang nabubuhay sa pagbebenta ng katawan ng babae.

Nakikiramay kami kay Angel na pininsala ng kontrobersiya. Isa siyang kilalang aktres na nagsisilbing modelo para sa maraming tagahanga, na kamakaylan ay nagpahayag ng pagtataguyod sa mga karapatan ng kababaihan. Ang kanyang pakikibaka para makahulagpos sa kontrobersiyang ito, na tinututukan ng midya, ay pakikibaka rin para bawiin ang kanyang pagkababae.

Gayundin, nakikiramay kami sa babaeng kahawig na Angel. Dahil doon, dumami ang mga usyoso sa kanyang video, na nagpalubha sa pagsasamantala sa kanya.

Ang industriya ng sex video ay nabubuhay sa pang-aabuso at pagsasamantala sa mga babae sa isang lipunan na patuloy na lumilibak at nagsasantabi sa kanila. Nagtataguyod ito ng – at tunay na kumikita sa -- pagpapatuloy ng isang kultura na aliw ang trato sa kababaihan, na sila ay hindi taong dapat igalang, kundi karaniwang produktong ginagamit kung naisin.

Ang paglaganap ng mga sex video ay dapat ipag-alala ng lahat, laluna ng mga institusyong panlipunan, gaya ng midya, na may mahalagang papel sa pagpapalaganap ng paggalang sa kababaihan.

Sapagkat sa huli, bawat isang may malasakit sa pagtataguyod ng makatwirang lugar ng kababaihan sa lipunan ay dapat na umako ng pananagutan sa ating paglaya mula sa kulturang lumilibak sa dignidad ng kababaihan.



(Sgd.) Lana Linaban
Pangalawang Pangkalahatang Kalihim, Gabriela
publicinfo@gabriela philippines.org